Лучшие книги Иды

Падзеі рамана вядомай шведскай пісьменніцы Іды Ліндэ «Паехаць на поўнач, каб памерці» разгортваюцца ў паўночнай Швецыі. У ім закранаюцца вельмі сур’ёзныя праблемы сацыяльнага, палітычнага і філасофскага кшталту, аднак гэта перш за ўсё мастацкі твор, і галоўны сродак яго ўздзеяння на чытача — мова.

У шведскім алфавіце 29 літар. Словы складаюцца з літар, а лісты – са словаў. Калі 29 літар дастаткова, каб утварыць бясконцае мноства слоў, 29 лістоў дастаткова, каб перадаць усю эмацыянальную палітру кахання, страты і гульняў памяці. У зборніку вершаў шведскай паэткі і пісьменніцы Іды Ліндэ няпэўна ўсё: і «я», і «ты» (ці гэта адное і тое ж «ты» ва ўсіх «лістах»? ці не размаўляе аўтар часам з уласным «я»?), і тыя падзеі, пра якія вядзецца размова (ці гэта ўсё рэальныя падзеі?). Падаецца, што гэтая татальная няпэўнасць і ёсць галоўным правілам гульні, да якой запрашаецца чытач. Менавіта ён павінен скласці пазл, упісаць свае радкі паміж…

Бацькі шведскай паэткі і пісьменніцы Іды Ліндэ – у мінулым футбольныя трэнеры. І сама Іда з дзяцінства займалася футболам, пакуль сур’ёзная траўма не прымусіла адмовіцца ад гульні. Пачынаючы з дэбютнага зборніка вершаў «Споведзь дзяўчыны-машыны» (2006), футбол «прапісаўся» ў яе творчасці.

«Нябесны футбол» – кніга аднаго верша. Філасофска-лірычныя радкі напісаны ў падманліва «дзіцячай» форме. Гэта разважанне пра складаныя сувязі паміж рознымі жыццёвымі досведамі – паміж дарослымі, якія ўжо маюць уласныя «крылы», і дзецьмі, для якіх усё толькі пачынаецца.