5

Думаю, калі зладзіць сярод дзяцей апытанку наконт іх страхаў, у лідары з вялікім адрывам вырвецца страх таго, што пад тваім ложкам нехта жыве. Нават не нехта, бо гэта ж не можа быць якая-небудзь добрая істота. Пад ложкам можа жыць адно вялікая і страшная пачвара, якая толькі і чакае, каб цябе з’есці. Такі закон.

А калі вам пашанцавала і пад вашым ложкам хаваецца нехта зусім не страшны? Галоўнае — знайсці належны падыход, каб пасябраваць з ім. Хлопчык Юзік ведае, што там дакладна нехта хаваецца, але што з гэтым рабіць? Чакаць, калі пачвара нападзе ці першаму нацкаваць на яе пэўных спецыялістаў? Але ж у школе не вучаць, да каго звяртацца, калі сутыкнуўся з такой праблемай. З бацькоў у гэтай сітуацыі таксама так сабе памочнікі. Таму хлопчык вырашае зрабіць першы крок: пачаставаць пачварку малаком. І гэты крок стане пачаткам вялікага сяброўства.

Надзея Ясмінска напісала выдатную дзіцячую кнігу пра пераадоленне страхаў, пра сяброўства і сілу дзіцячай фантазіі. Дзіцячы персанаж не толькі выклікае давер, але і сапраўды можа існаваць у рэальнасці.

А дарослыя могуць знайсці ў кнізе і парады для сябе: як вы да праблемы ставіцеся, такой яна і будзе. Адразу ўспрымаеце ўсё негатыўна, панікуеце і енчыце, што ў вас нічога не атрымаецца? Упэўніваю, што так і будзе. Хто жыве пад нашым ложкам, сябар ці вораг, залежыць толькі ад нас.

Цудоўныя яркія ілюстрацыі да кнігі зрабіла Святлана Міхалап. Кніга дакладна ўпрыгожыць любую бібліятэку. Да таго ж яна настолькі мілая і прыемная, што з лёгкасцю стане любімай у вашых дзяцей.

А хто жыве пад вашым ложкам?