Новинки Наста Кудасава

Наста Кудасава - беларуская паэтка, перакладчыца. Нарадзілася 25 мая 1984 г. у Рагачове Гомельскай вобласці. Аўтарка кніг паэзіі «Лісце маіх рук» (2006), «Рыбы» (2013), «Маё невымаўля»(2016), «Вясна. Вуснам цесна» (2021), «Побач» (2022). Перакладае паэзію з рускай, украінскай, удмурцкай на беларускую мову. Атрымала прэмію Беларускага ПЭН-цэнтра «Кніга году-2016» за зборнік «Маё невымаўля», прэмію «Празрысты Эол» (2018) у намінацыі «Найлепшая паэтычная публікацыя года», літаратурную прэмію імя Міхася Стральцова ў 2021 г. Лаўрэатка стыпендыі імя Магдалены Радзівіл для пісьменніц і перакладчыц (2018), лаўрэатка першага фэста Уладзіміра Караткевіча (2019). Вершы перакладзеныя на польскую, чэшскую, украінскую, літоўскую і іншыя мовы. У кнігу ўвайшлі вершы напісаныя з 20 жніўня 2020 г. па 26 снежня 2022 г.

Кніга «Побач» — гэта ілюстраваны збор вершаў, які распавядае пра адзіноту і надзею, пра пошук сябе і радзімы ў шалёных варунках рэчаіснасці. Нітуючы асабістае і гістарычнае, моўнае і візуальнае, зборнік паказвае шматаблічны свет растрывожанага сучаснасцю чалавека: ад роспачы і зняверанасці да захаплення жыццём. Гэта кніга цяпла і памяці, кніга дарогі і станаўлення. Застацца «побач» на гэтым шляху — значыць захаваць чуласць і цяпло, не згубіць у полі зроку іншага чалавека, не адвярнуцца адно ад аднаго.

Ілюстрацыі Святланы Дземідовіч.

У кнігу «Вясна. Вуснам цесна» ўвайшлі найлепшыя творы аўтаркі з пагіярэдніх зборнікаў і новыя тэксты. Вершы, проза і дзённікавыя запісы выяўляюць непаўторнасць лірычнага светапогляду паэтэсы, багацце яе воб- разных і рытміка-інтанацыйных знаходак, поліфанічнасць эмацыянальных перажыванняў, шчырасць і дасканаласць мастацкага стылю.

Кнігу "Маё невымаўля" склалі новыя вершы паэтэсы, напісаныя ў 2011-2015 гадах.

У зборнік Насты Кудасавай "Рыбы" увайшлі выбраныя вершы з кнігі "Лісце маіх рук", а таксама новыя творы, напісаныя ў 2006-2011 гг.

Дэбютная кніга Насты Кудасавай "Лісьце маіх рук" будзе цікавая самаму шырокаму колу чытачоў, у тым ліку яна прыйдзецца даспадобы найбольш патрабавальным і кшталтаваным аматарам паэзіі. Чаму? Адказ вельмі просты: вершы Насты, збольшага вытрыманыя ў клясычнай манеры, дэманструюць набыты аўтаркай у змаганьні з прозай жыцьця досвед, а таксама эмоцыі ды рэфлексіі, блізкія літаральна кожнаму.